وزن کم کرنا : 5 مؤثر طریقے
انسانی زندگی میں صحت کی اہمیت سے انکار نہیں کیا جا سکتا۔ اگر جسم تندرست ہو، تو زندگی کے ہر شعبے میں کام کرنا آسان ہو جاتا ہے۔ مگر جب جسم کا توازن بگڑ جائے، خاص طور پر جب وزن حد سے بڑھ جائے، تو نہ صرف جسمانی تھکن، بلکہ ذہنی دباؤ بھی بڑھنے لگتا ہے۔ ایسے میں ہر انسان کے دل میں ایک ہی خواہش پیدا ہوتی ہے اور وہ خواہش ہے وزن کم کرنا۔ یہ ایک ایسا خواب ہے جو کچھ لوگوں کے لیے تو روزمرہ کی جدوجہد بن چکا ہے، اور کچھ کے لیے ایک طویل اور تھکا دینے والا سفر مگر افسوس کہ وہ کامیاب نہیں ہو پا رہے ۔ لیکن اگر آپ اس خواہش کو سنجیدگی سے لیں اور اس کے لیے ایک مستقل اور معتدل طریقہ اختیار کریں، تو یہ سفر نہایت خوشگوار اور نتیجہ خیز بن سکتا ہے۔
Table of Contents
سب سے پہلے ہمیں یہ سمجھنا ہوگا کہ وزن کم کرنا کوئی جادو کا کھیل نہیں، نہ ہی ایک رات میں ہونے والا عمل ہے۔ ایک اسٹیج شو میں جب کسی ایکٹر سے اُسکی صحت کا راز پوچھا گیا تو انہوں نے بتایا کہ یہ سالہا سال کی محنت ہے ۔ عوام میں سے ایک شخص کھڑا ہوا اور وہ کہنے لگا کہ میری توند اتنی بڑھی ہوئی ہے کوئی ایسا طریقہ بتا دیں کہ تین چار ماہ میں ہی یہ ختم ہوجائے ۔ تو اُس ایکٹر نے بہت شاندار جواب دیا کہ پہلے یہ بتاؤ اتنی توند بڑھانے میں کتنا وقت لگا ؟ تو سوال پوچھنے والے نے جواب دیا کہ دس بارہ سال ہوگئے ہیں یہی حال ہے ۔ تو ایکٹر نے جواب دیا کہ بس پھر اب دس بارہ سال دوبارہ محنت کرو ۔ یعنی یہ ایک مسلسل کوشش کا نام ہے، جو پانچ بنیادی اصولوں پر مبنی ہے: غذا، ورزش، روزہ، واک، اور طبی علاج۔ ان طریقوں میں سے ہر ایک اپنی جگہ اہم ہے، اور اگر ان پر درست طریقے سے عمل کیا جائے تو وزن کم کرنا خواب نہیں رہے گا بلکہ ایک حقیقت بن جائے گا ۔
پہلا طریقہ: غذا کے ذریعے وزن کم کرنا
غذا وہ بنیاد ہے جو ہمارے جسم کی شکل وصورت کو بناتی ہے ۔ ہم جو کھاتے ہیں، وہی ہمارے جسم کا حصہ بنتا ہے۔ جب ہم ضرورت سے زیادہ کیلوریز لے لیتے ہیں، یا چکناہٹ سے بھرپور خوراک کھاتے ہیں، تو ہمارا جسم اضافی توانائی کو چربی کی شکل میں محفوظ کر لیتا ہے۔ یہی چربی وقت کے ساتھ بڑھ کر وزن بڑھانے کا سبب بنتی ہے۔ لہٰذا، وزن کم کرنا ہو تو سب سے پہلے اپنی غذا کو متوازن اور صحت مند بنانا ضروری ہے۔
سب سے مؤثر طریقہ یہ ہے کہ ہم سفید آٹے، چینی، اور فرائیڈ (تلے ہوئے) کھانوں سے پرہیز کریں۔ ان کی جگہ دالیں، سبزیاں، پھل، اور اجوائن، زیرہ، ہلدی جیسے قدرتی مسالے استعمال کریں۔ دن کا ناشتہ مکمل، دوپہر کا کھانا ہلکا، اور رات کا کھانا بہت سادہ اور جلدی کھانا بہتر ہے۔ ساتھ ہی، پانی کی مقدار میں اضافہ کیا جائے کیونکہ یہ نظامِ ہضم کو بہتر بناتا ہے اور فالتو چربی کے اخراج میں مدد دیتا ہے۔ یہ چند اصولی باتیں ذہن نشین کرلیں ۔
ایک اور دلچسپ حقیقت یہ ہے کہ کھانے کے وقت کے علاوہ بھی ہماری عادتیں وزن پر اثر ڈالتی ہیں۔ مثال کے طور پر ٹی وی دیکھتے وقت کھانا، یا نیند سے فوراً پہلے کھانا، یہ دونوں عادتیں وزن بڑھانے کا سبب بنتی ہیں۔ اگر ان معمولات میں تبدیلی لائی جائے، تو وزن کم کرنا نسبتاً آسان ہو جاتا ہے۔
دوسرا طریقہ: ورزش کے ذریعے وزن کم کرنا
جب بات ہو وزن کم کرنے کی، تو غذا کے بعد دوسرا سب سے اہم مرحلہ ہے: ورزش کرنا ۔ یہ ایک ایسا عمل ہے جو نہ صرف جسم کو چست بناتا ہے، بلکہ اس سے ہمیں ذہنی سکون بھی ملتا ہے ۔ ورزش کے ذریعے ہم وہ کیلوریز جلاتے ہیں جو خوراک کے ذریعے جسم میں جمع ہو چکی ہوتی ہیں۔ خاص طور پر ایروبک ورزشیں جیسے کہ سائیکلنگ، تیراکی، اور جاگنگ جسم کی چربی کو کم کرنے میں بہت مؤثر ہیں۔
ورزش کے بارے میں ایک بڑی غلط فہمی یہ پائی جاتی ہے کہ اسے جم جا کر ہی کرنا ضروری ہے، حالانکہ سادہ سی جسمانی حرکتیں بھی بہت کارگر ثابت ہو سکتی ہیں۔ جیسے کہ 10 منٹ کے لئے اگر گھر میں رسہ کودنے کی ورزش کی جائے، 15 منٹ کی سیڑھیاں چڑھنا، یا 20 منٹ کی ہلکی پھلکی اسٹریچنگ بھی جسمانی وزن میں واضح فرق لا سکتی ہے۔
اہم بات یہ ہے کہ ورزش کو زندگی کا مستقل حصہ بنایا جائے، نہ کہ وقتی جذبے میں کچھ دن کے لیے کرنے کے بعد پھر چھوڑ دی جائے ۔ جیسے جیسے وقت گزرتا ہے، ہمارا جسم ورزش کا عادی ہو جاتا ہے اور پھر وزن کم کرنا صرف ایک خواب نہیں رہتا، بلکہ ایک حقیقت بن جاتا ہے۔
تیسرا طریقہ: روزے کے ذریعے وزن کم کرنا
اسلام میں روزے کا مقصد محض روحانی طہارت نہیں، بلکہ جسمانی صحت بھی ہے۔ سائنسی تحقیق سے یہ ثابت ہو چکا ہے کہ وقفے وقفے سے روزہ رکھنا
(Intermittent Fasting)
وزن کم کرنے کا مؤثر طریقہ ہے۔ جب ہم مخصوص اوقات میں کھاتے ہیں اور دن کا ایک بڑا حصہ کچھ نہ کھا کر گزارتے ہیں، تو جسم فالتو چربی کو توانائی میں بدلنا شروع کر دیتا ہے
روزے کی خاص بات یہ ہے کہ یہ صرف کیلوریز کو کم کرنے کا ذریعہ نہیں، بلکہ ہاضمہ کو بھی بہتر بناتا ہے اور جسم کو
Detox
کرتا ہے۔ خاص طور پر اگر روزے کے دوران افطار اور سحری میں ہلکی، سادہ اور قدرتی غذا کا استعمال کیا جائے، تو اس کے فوائد دوگنے ہو جاتے ہیں۔ روزے سے جُڑی ایک روحانی طاقت بھی ہے جو انسان کو صبر، نظم و ضبط، اور پرہیزگاری سکھاتی ہے۔ یہ تمام صفات اُس وقت بہت کام آتی ہیں جب انسان وزن کم کرنا چاہتا ہے، کیونکہ یہ سفر بھی صبر اور مستقل مزاجی کا تقاضا کرتا ہے۔
چوتھا طریقہ: واک کے ذریعے وزن کم کرنا
واک یا چہل قدمی ایک ایسی آسان اور قدرتی ورزش ہے جو ہر عمر کے فرد کے لیے موزوں ہے۔ نہ کوئی مشین چاہیے، نہ جم کی فیس، نہ وقت کی قید۔ صرف ایک اچھے جوڑے جوتے اور عزم کی ضرورت ہے۔ صبح کے وقت تازہ ہوا میں بیس سے تیس منٹ کی تیز چہل قدمی، جسم میں چربی گھلانے کا بہترین طریقہ ہے۔
واک کرنے سے نہ صرف جسم متحرک ہوتا ہے، بلکہ دورانِ خون بھی بہتر ہوتا ہے، اور پٹھے چست ہو جاتے ہیں۔ وزن کم کرنا اگر آپ کا ہدف ہو تو واک کو اپنے روزمرہ شیڈول کا لازمی حصہ بنا لیجئے۔ خصوصاً کھانے کے بعد کی واک نظامِ ہضم کو بہتر بناتی ہے اور کھائی گئی کیلوریز فوری جلنا شروع ہو جاتی ہیں۔
شہروں کی مصروف زندگی میں واک کرنے کے لیے وقت نکالنا بظاہر مشکل لگتا ہے، مگر اگر انسان اپنی زندگی میں تھوڑی سی ترتیب لے آئے تو یہ کام آسان ہو جاتا ہے۔ لفٹ کی جگہ سیڑھیوں کا استعمال، قریبی دکان تک پیدل جانا، اور دوستوں کے ساتھ واک کو تفریح بنانا، یہ سب چھوٹی چھوٹی عادتیں بڑی تبدیلی لا سکتی ہیں۔
پانچواں طریقہ: میڈیکل ٹریٹمنٹ سے وزن کم کرنا
اگرچہ قدرتی طریقے بہترین ہیں اور یہی اختیار کرنے چاہئے ۔ مگر بعض اوقات وزن اس حد تک بڑھ چکا ہوتا ہے کہ اس پر صرف غذا، ورزش یا روزے سے قابو پانا مشکل ہو جاتا ہے۔ ایسے حالات میں طبی علاج کی ضرورت پیش آتی ہے۔ میڈیکل ٹریٹمنٹ کا مطلب صرف سرجری نہیں ہوتا، بلکہ یہ ایک پورا پروسیس ہوتا ہے جس میں ڈاکٹر کی نگرانی میں ڈائٹ پلان، میڈیسن، اور خصوصی تھیراپیز شامل ہوتی ہیں۔ ڈاکٹرز کی فیس ادا کرنے کے بعد بندہ بہت توجہ سے اور مسلسل رہنمائی سے چلتا ہے جس سے یہ سفر بہت آسان اور مؤثر ہوجاتا ہے ۔
آج کل میڈیکل سائنس نے بہت ترقی کر لی ہے۔ مثلاً لیپو سکننگ (مکمل تفصیلات دیکھئے)، بیریاٹرک سرجری، یا میٹابولک تھراپی جیسے طریقے ایسے افراد کے لیے مفید ہیں جو موٹاپے کے شدید مسائل کا شکار ہیں۔ تاہم، کسی بھی میڈیکل علاج سے پہلے مکمل معائنہ اور ماہر ڈاکٹر سے مشورہ ضروری ہے اور حتی الامکان ان چیزوں سے بچنا بھی ضروری ہے ۔ اصل چیز ہے ہمت اور عزم ۔ اگر یہ دو چیزیں نہ ہوئی تو آپریشن کروانے کے بعد جو وزن کم ہوگا وہ چند دن میں ہی دوبارہ بڑھ جائے گا ۔
یہاں ایک اہم بات سمجھنے کی ہے: طبی علاج صرف ایک سہارا ہوتا ہے، اس کا مطلب یہ نہیں کہ غذا، ورزش اور نظم و ضبط کی ضرورت ختم ہو گئی ہے۔ علاج کے بعد اگر انسان اپنی عادتیں نہ بدلے، تو وزن دوبارہ بڑھ سکتا ہے۔ لہٰذا، اس مرحلے پر بھی وزن کم کرنا ایک مستقل جذبے اور طرزِ زندگی کی تبدیلی کا تقاضا کرتا ہے۔
یاد رکھنے کی بات:۔
وزن کم کرنا بظاہر ایک جسمانی عمل ہے، مگر درحقیقت یہ ذہنی، روحانی اور طرزِ زندگی سے متعلقہ ایک مکمل سفر ہے۔ یہ پانچ راستے — غذا، ورزش، روزہ، واک، اور طبی علاج— صرف جسم کو نہیں بدلتے، بلکہ انسان کی سوچ، اس کی خود اعتمادی، اور زندگی کے اصولوں کو بھی بہتر بناتے ہیں۔ وزن کم کرنا دراصل خود کو پہچاننے، سنوارنے، اور زندگی کو بہتر بنانے کا نام ہے۔ یاد رکھیے، کوئی بھی طریقہ ایک دن میں معجزہ نہیں کرتا۔ وزن کم کرنا ایک صبر آزما اور باوقار جدوجہد ہے۔ جب آپ روزمرہ کی چھوٹی چھوٹی تبدیلیوں کو مستقل مزاجی کے ساتھ اپناتے ہیں، تو بڑے بڑے نتائج خودبخود ظاہر ہونے لگتے ہیں۔
اگر آپ نے بھی یہ فیصلہ کر لیا ہے کہ اب وقت آ گیا ہے اپنے آپ کو بہتر بنانے کا، تو دیر مت کیجئے۔ آج ہی سے اپنا سفر شروع کیجئے۔ ایک چھوٹا قدم، ایک سادہ سا فیصلہ، اور آپ کا وزن کم کرنا حقیقت بن سکتا ہے۔
آخر میں ایک گزارش:۔
صحت کی قدردانی اور صحت کے متعلق اردو میں آگاہی کے لئے ہم نے صحت دوست نام سے یہ ویب سائٹ بنائی ہے جس کا لنک یہ ہے
https://sehatdost.online/
اسی طرح کی سینکڑوں اور ویب سائٹس بھی انٹرنیٹ پر موجود ہیں مگر اکثر جھوٹی معلومات فراہم کررہے ہیں ۔ کچھ ایسی ہیں جو صحیح معلومات دے رہی ہیں مگر انگریزی میں ہیں جیسا کہ انگریزی کی ایک ویب سائٹ ویب ایم ڈی اور دوسری ڈبلیو ایچ او جن پر مستند ذرائع اور تحقیقات شامل کی جاتی ہیں ۔ ہماری ویب سائٹ پر بھی اُنہی کے حوالے نقل کئے جائیں گے ۔
صحت دوست کی ویب سائٹ پر مختلف کیٹگریز اور صحت کے متعلق سینکڑوں، ہزاروں مضامین آپکو مفت میں پڑھنے کو مل جائینگے ۔ نیچے دئیے گئے لنک پر آپ مختلف کیٹگریز کو دیکھ سکتے ہیں ۔
https://sehatdost.online/all-categories-of-sehatdost-online/
اگر آپکو ہماری ویب سائٹ پر موجود مضمون پسند آتا ہے تو اِسکو شئیر ضرور کریں ۔ واٹس ایپ، فیس بوک یا کسی بھی سوشل میڈیا پر شئیر کرکے ہماری اس جدوجہد میں حصہ ملائیں ۔ شکریہ ۔
